काठमाडौं । एसीसी प्रिमियर कपको समूह चरणको अन्तिम खेलमा नेपाल हङकङसँग १५ रनले पराजित भएको छ । हङकङले दिएको २६२ रनको लक्ष्य पछ्याएको नेपाल ४९.१ ओभरमा २४६ रनमा समेटियो ।
नेपालका लागि इशान पान्डेले सर्वाधिक ९० रन बनाए। उनले उत्कृष्ट इनिङ खेले पनि टोलीलाई जित दिलाउन सकेनन् । आसिफ शेखले ४४, दीपेन्द्रसिंह ऐरीले २५, करण केसीले २१ र गुल्शन झाले २० रन बनाए ।
हङकङका एइजाज खानले नेपालका ४ विकेट लिए। यासिम मुर्तजाले २ तथा किन्चित शाह, नसरुल्ला राना र अतिक इक्बालले १–१ विकेट लिए ।
यसअघि बाबर हायातको शानदार अविजित शतकको मद्दतमा हङकङले निर्धारित ५० ओभरमा ७ विकेट गुमाएर २६१ रन बनाएको थियो ।
एक समय १३३ रनमा ७ विकेट गुमाएर दबाबमा परेको हङकङलाई बाबर हायात र एहसान खानले सम्हालेका थिए। यी दुईले १२८ रनको अविजित साझेदारी गर्दै टोलीलाई सम्मानजनक योगफलसम्म पुर्याए
बाबरले १२७ बलमा ७ चौका र ७ छक्काको मद्दतले ११७ रन बनाएर अविजित रहे । एहसान खान ३४ रनमा नटआउट रहे। त्यसअघि शाहिद वासिफले ४५ रनको योगदान दिएका थिए ।
नेपालका लागि कप्तान सन्दीप लामिछानेले १० ओभरमा ४४ रन खर्चेर ४ विकेट लिए । शेर मल्लले १० ओभरमा २७ रन दिँदै ३ विकेट लिए ।
हङकङसँगको जितसँगै नेपाल र हङकङ दुवै प्रतियोगिताको सेमिफाइनलमा प्रवेश गरेका छन् । हङकङको जितपछि आयोजक मलेसिया भने प्रतियोगिताबाट बाहिरिएको छ ।
