नुवाकोट । बाढी तथा विपद्बाट प्रभावित परिवारलाई सहयोग गर्ने उद्देश्यले प्रिमियर फाउन्डेसनले नुवाकोटको देविघाट क्षेत्रमा राहत सामग्री वितरण गरेको छ। फाउन्डेसनले पहिलो चरणअन्तर्गत ३०० बाढी प्रभावित परिवारलाई २१ प्रकारका अत्यावश्यक घरायसी तथा व्यक्तिगत सामग्री उपलब्ध गराएको हो।
फाउन्डेसनका अध्यक्ष **मोहम्मद जमालुद्दिन रिज्वी (Mohammad Jamaluddin Rizvi)**को नेतृत्वमा सञ्चालन भइरहेको मानवीय सहायता अभियानअन्तर्गत राहत वितरण गरिएको जनाइएको छ।
मानवता, सेवा र राहतलाई आफ्नो प्रमुख उद्देश्य बनाउँदै आएको फाउन्डेसनले विपद्का समयमा प्रभावित समुदायसँग प्रत्यक्ष रूपमा जोडिएर सहयोग गर्दै आएको जनाएको छ।
प्रिमियर फाउन्डेसनको सेवा तथा मानवीय अभियान नेपालमा मात्र सीमित नभई चीन, भारत, भियतनाम, अमेरिका लगायत विभिन्न देशमा समेत सञ्चालन हुँदै आएको बताइएको छ। विपद् तथा संकटका समयमा प्रभावित समुदायलाई आवश्यक सहयोग उपलब्ध गराउने उद्देश्यले फाउन्डेसनले विभिन्न राहत तथा सामाजिक सेवाका कार्यक्रम सञ्चालन गर्दै आएको छ।
नेपालमा पनि आफ्नो सामाजिक उत्तरदायित्वलाई निरन्तरता दिँदै फाउन्डेसनले पहिलो चरणमा बाढी प्रभावित ३०० परिवारलाई राहत उपलब्ध गराउने अभियान अघि बढाएको हो। राहत प्याकेजमा म्याट्रेस, मच्छरदानी, बेडसिट, फाइबर कम्बल, फाइबर सिरानी, ग्यास चुलो, फ्राइङ प्यान, प्लेट, कचौरा, गिलास, बाउल, चक्कु, डेक्ची, चम्चा तथा आवश्यक लत्ताकपडा लगायतका सामग्री रहेका छन्।
राहत वितरणका क्रममा प्रिमियर फाउन्डेसनका कन्ट्री हेड–नेपाल (अपरेसन) अच्चे उद्दिन तथा कन्ट्री कोअर्डिनेटर–नेपाल रमेश कुमार कर्ण स्वयं प्रभावित क्षेत्रमा पुगेर परिवारलाई राहत सामग्री हस्तान्तरण गरेका थिए।
फाउन्डेसनले पहिलो चरणको राहत अभियान सफलतापूर्वक अघि बढिरहेको जनाउँदै दोस्रो चरणमा थप प्रभावित परिवारसम्म पुगेर सहयोग विस्तार गर्ने तयारी भइरहेको जनाएको छ।
विपद्को समयमा प्रभावित नागरिकलाई आवश्यक सामग्री उपलब्ध गराउँदै प्रिमियर फाउन्डेसनले मानवीय सेवाप्रतिको आफ्नो प्रतिबद्धता प्रस्तुत गरेको छ। “यो केवल राहत वितरण मात्र होइन, कठिन समयमा नेपाल र नेपाली समुदायसँगै उभिने प्रतिबद्धता हो,” भन्ने भावनासहित फाउन्डेसनले आफ्नो अभियानलाई निरन्तरता दिएको छ।
