काठमाडौं । टाटा मोटर्सको लोकप्रिय विद्युतीय एसयूभी पन्च ईभीको फेसलिफ्ट संस्करण नेपाल आइपुगेको छ । टाटाको आधिकारिक बिक्रेता सिप्रदी ट्रेडिङले नयाँ पन्च ईभी नेपाल ल्याएको हो ।
टाटा मोटर्सले पन्च ईभीको फेसलिफ्ट मोडललाई नयाँ डिजाइन, ठूलो ब्याट्री र थप फिचरसहित बजारमा उतारेको हो । यसको अगाडिको डिजाइन, पछाडिको लाइट, ड्यासबोर्ड लगायतका कुरामा परिमार्जन भएको छ ।
कम्पनीका अनुसार पन्च ईभीको फेसलिफ्टमा मुख्य परिवर्तन बाहिरी डिजाइनमा देख्न सकिन्छ । अगाडिको भागमा परिमार्जित बम्पर प्रयोग गरिएकोा छ । क्लोजअफ ग्रिल डिजाइनले निरन्तरता पाएको छ ।
हेडलाइटलाई जोड्ने अघिल्लो कालो ट्रिम हटाइएको छ । वाई आकारका एलईडी डीआरएल र अगाडिको भागको बीचमा राखिएको चार्जिङ फ्ल्यापलाई भने यथावत् राखिएको छ । पछाडि वारपार कनेक्टेड लाइटको प्रयोग पाउन सकिन्छ ।
बढ्यो ब्याट्री साइज
नयाँ पन्च ईभीमा अघिल्लो मोडलको तुलनामा ठूलो ब्याट्री प्याक प्रयोग गरिएको छ । फेसलिफ्ट संस्करण ३० किलोवाट आवर र ४० किलोवाट आवर गरी दुई ब्याट्री विकल्पमा पाउन सकिन्छ ।
यसअघि पन्च ईभीमा २५ किलोवाट आवर र ३५ किलोवाट आवरको दुई ब्याट्री अप्सन थियो । दुवै भेरियन्टमा ५ किलोवाट आवर ब्याट्री बढेको हो । फेसलिफ्ट पन्चमा डीसी चार्जरको क्षमता पनि बढेको छ । नयाँ मोडलमा ६५ किलोवाट क्षमताको डीसी फास्ट चार्जिङ सपोर्ट गर्छ ।
भारतमा पन्च ईभीको ३० किलोवाट आवर ब्याट्री भएको मोडल स्मार्ट र स्मार्ट प्लस गरी दुई भेरियन्टमा उपलब्ध छ । ४० किलोवाट आवर ब्याट्री भएको संस्करण भने स्मार्ट प्लस, एड्भेन्चर, इम्पावर्ड र इम्पावर्ड प्लस एस गरी चार भेरियन्टमा उपलब्ध छ । नेपाल कुन कुन भेरियन्ट आउँछ भन्ने एकिन जानकारी सिप्रदी उपलब्ध गराइसकेको छैन ।
डिजाइन र इन्टेरियरमा पनि अपडेट
नयाँ पन्च ईभीमा टाटाका ठूला विद्युतीय एसयूभीबाट प्रेरित १६ इन्चको एरो अप्टिमाइज्ड अलोय ह्वील प्रयोग गरिएको छ ।
इन्टेरियरमा ड्यासबोर्ड डिजाइनलाई निरन्तरता दिइए पनि नयाँ ट्रिम फिनिस र अपडेटेड डुअल टोन कलर थिम थप भएको छ । यसमा १०.२५ इन्चको इन्फोटेनमेन्ट टचस्क्रिन र १०.२५ इन्चकै डिजिटल ड्राइभर डिस्प्ले दिइएको छ ।
भेरियन्ट अनुसार वायरलेस चार्जिङ, भेन्टिलेटेड सिट, एम्बियन्ट लाइट, कनेक्टेड कार प्रविधि र ३६० डिग्री क्यामेरा जस्ता फिचर उपलब्ध छन् ।
सुरक्षातर्फ ६ वटा एयरब्याग, इलेक्ट्रोनिक स्टेबिलिटी कन्ट्रोल (ईएससी), हिल होल्ड असिस्ट, टायर प्रेसर मोनिटरिङ सिस्टम, आईएसओफिक्स चाइल्ड सिट माउण्ट र हाइ बिम असिस्ट लगायतका फिचर छन् ।
