काठमाडौं । रूकुम पश्चिम जिल्लाको आठबिसकोट नगरपालिकामा बन्ने २१ मेगावाट क्षमताको जल्दीगाड जलविद्युत आयोजना निर्माणको लागि प्रबर्द्धक कम्पनी र सहवित्तीयकरणमा सहभागी बैंकहरू बीच वित्तीय व्यवस्थापन सम्झौतामा हस्ताक्षर सम्पन्न भएको छ ।
आयोजनाको कूल लागत ४ अर्ब ६० करोड रूपैयाँ मध्ये राष्ट्रिय वाणिज्य बैंक लिमिटेडको अगुवाईमा नेपाल बैंक लिमिटेड र नेपाल पूर्वाधार विकास बैंक लिमिटेड मार्फत सहवित्तीयकरण कर्जा ३ अर्ब ४२ करोड रुपैयाँ प्रदान गर्ने र बाँकी रकम स्वपॅूजीबाट व्यवस्थापन गर्ने सहमती भएको छ । सहवित्तीयकरण कर्जातर्फ राष्ट्रिय वाणिज्य बैंक लिमिटेडको १ अर्ब ४२ करोड रुपैयाँ, नेपाल बैंक लिमिटेडको १ अर्ब रुपैयाँ र नेपाल पूर्वाधार विकास बैंक लिमिटेडको १ अर्ब रुपैयाँ लगानी रहनेछ ।
यो परियोजनाले कर्णाली क्षेत्रको आर्थिक तथा सामाजिक विकासमा सकरात्मक प्रभाव पर्ने अपेक्षा गरिएको छ । आयोजना निर्माणका लागि आवश्यक वित्तीय व्यवस्थापन सुनिश्चित गर्ने उद्देश्यले आयोजना तथा बैंक प्रतिनिधिहरूको उपस्थितिमा बिहीबार राष्ट्रिय वाणिज्य बैंक लिमिटेडको केन्द्रीय कार्यालय सिंहदरबारप्लाजामा एक समारोहका बीच सम्झौता भएको हो ।
